Zazba-e-Kamyabi : Ankit

Makan chahiye gar rihayash ko tujh ko
Kagaj-o- kalam se khinche naksha koyi
Sir dhakne ke kabil aek makan nahin hota
Kismet ke bharose rahe baithe mere yaron !
Kamchoron ka mukammal jahan nahin hota.

Man ke khet men dalo tamannaon ke beej yaron
Lagan aaur mehnat se karni hai rakhwali tujh ko
Sinchoge pasine se apne to lahlahayegi fasalen
Kamyab hone walon ka murda bayaan nahin hota.

Puchha kiya nazumin se hal-e-kismat apna tum ne
Na jane sitaron ke kis chalan se kaha kuchh us ne
Socho kabhi ilm unke men
Khud ke mukkadar ka makool thikana nahin hota.

Kahte ho raat-o-din chilla ke
Unki kismet ka sitara tha buland
Kamyabi unki ke peechhe hui
Mehanat aaur taqleefon ke
Hisabon ka milana nahin hota.

Sabit hai tazurba-e-science se
Jhonki jisne taqat jehani-o-jismani
Jis shey ko pane aaur apnane men,
Yaron !us shey ke khatir chehra uska
Kisi haal men anjana nahin hota.

Mere liye mauke nahin
Mera koyi sangi sathi nahin
Mere sitare achche nahin
Sab baten hain nakamayabi ki
Kamayab logon ke sang
Shuruat men jamana nahin hota.

Thonk seene ko badh chalo aage rahi
Thokren khakar sambhalana hai tujhe
Khwabaaluda aankho se jagna hai tujhe
Safar ki dastan bas yahi hai mere dost
Manzil ko rahon ne bhi pahchana nahin hota.

Neenv Aaur Kangoore : Ankit

Aaur gahri
Aaur gahri
Khodani hai neenv
Tujhe filhal ;
Agar karni hai
Tameer tumhe
Aek unche
Khoobsurat mahal ki………

Jab talak
Nahin milega
Mati ka lagaw
Nahin aayega
Tere Bharose men
Neela aasman
Jise nahin hai
Shauk dekhna kattayi
Kisi buland imarat ke
Kanguron ko
Uski bhahri chamak ko……..

Gar nahin hoga
Tera judav
Gagan ki sahdharmini
Jeevan sangini
Mehbooba
Jamin se,
Sunghenge dhool
Pal bhar men
Tumahri satrangi kalpanayen
Tumhare srijan ke sapane………..

Khatir isike
Hey srijak !
Aaur gahri
Khodani hai neenv
Tujhe ab bhi ;
Karani hai gar
Tameer tumhe
Aek unche
Khoobsurat mahal ki………

Arpan

Tyag
Daan
Arpan
Teenon hi shabd
Hoten hai prateet
Samanarthak
Karten hain baat
Kuchh dene ki.

Tyaag men
Chhod deten hain
Swamitva apna
Nahin hai sankalp
Kiska hoga swamitva……..

Daan men bhi
Chhoda jata hai swamitav
Kintu utpann kiya jata hai
Kisi aaur ka swamitva
Dene wale ka haath
Rahta hai upar
Lene wale ka neeche
Yah unch neech la sakta hai
Tanik bhav
Ahamkar ka……………

Arpan men
Li jati hai vastu
Anjuri men
Kiya jata hai
Sahaj samarparn
Bhav hote hain anugrah ke
Paane wale ke prati
Shradha aevam
Samman se aot-prot…………….

Layen bhav
Sarvasva hai prabhu ka
Mera apna kuchh nahin
Swamitva ka bas
Bhram mujhe
Tera kar raha hun
Arpan tujhko
Karo mukt mujhe
Hey Prabhu !
Mithya mamatva se……………

(Geeta ke navam adhyay ke shlok 27 se prerit)

Prerak Shlok :

Yatkarosi yadasnasi
Yajjuhosi dadasi yat !
Yattapasyasi kaunteya tatkurusva
madarpanam !! 9/27 !!

Whatever you do, whatever you eat, whatever you offer or give away, whatever austerities you perform, do that, O son of Kunti as an offering to me.
________________________________________________________________

Bhookh Aaur Aasman......

Jamin par
Bikhre danon ko
Dekha tha jab
Udte hue
Parinde ne
Hua tha mehsoos
Kuchh usko
Samet li thi
Pankhe apni
Aaur utar
Aaya tha
Jamin par
Kahte hue:
Bhookh
Badi hai
Aasman se.........

Dard Ke Ehsason Ke Bina....

Benamak hai zindagi
Dard ke ehsason ke bina
Srijan ki bel ko
Rakhti hai hara
Anchahi si peeda……

Lag jati hai deemak
Aish-O-aaram ki
Chetna aaur samvedna ko
Rah jata hai
Bas khokhla sa insan…..

Suraj gar nahin doobta
Batao na
Andheri raat ke safe par
Kaun likh pata
Taron ki nazm………

Nahin chhate
Badra kajrare
Batao na
Kaisi sajati
Aasman par
Satrangi indradhanush…….

Dard ne rakha hai
Zindagi ko zinda
Batao na
Hamdardi na hoti agar
Insan kaise karta
Mehsoos
Noor khuda ka………..

Rishton Ke Rakhav Men III

Rishton ke
Rakhav men
Sahajta ka
Abhav Kyon ?

Radha ne
Kisun se
Neh lagaya tha,
Kanha ne
Us pawan prem ko
Hridaya se
Nibhaya tha,
Kisi ne dono ko
Mandap tale
Nahin bithaya tha,
Saptapadi ke
Samajik niyamon se
Nahin bandhaya tha,
Purna purush ne
Purna-nari ko
Atam-vat
Apanaya tha,
Krishan men thi
Vilin Radha, aaur
Radha men bhi
Kisana samaya tha,
Bhaktiyug ke
Kaviyon ne
Isi Prem ko
Apne geeton men
Gungunaya tha………………..

Nahin thakte hum
Japte hue naam
Radheyshyam ka,
Kya bhoola ja
Sakta hai wah
Manzar Brijdham ka,
Jahan raas hua tha
Brijkishori-Sundar Shyam ka,
Har mandir men
Hota hai darshan
Premi-yugal
Purna-vritul
Radheyshyam ka,
Vrindavan ke sang
Sumrin karte hain
Hum Barsana naam ka.
Chandan tilak
Shri Radha hai
Vishvapati
Saligram ka.

Paya tha samroop
Prabhu ke
Radhika aaradhika ne,
Gunjayman hai sarvatra
Madhur uchcharan
Radhey Radhey,
Bin radhey
Krishna hai aadhey.

Fir bhi sachche premiyon ke
Pragadh pavitra prem se
Samaj ka durbhav kyon……………?
Rishton ke rakhav men
Sahajta ka abhav kyon………….?

Imaan-O-Yakeen

Beej nahin karta hai
Parvah
Boote ke ugane ki
Boote ke phalne ki

Diya nahin hota hai
Fikramand
Suraj ke jalwa hone ka
Suraj ke doob jane ka

Hota hai Imaan-O-Yakin
Beej ka galne men
Diye ka jalne men……